स्वस्थानी व्रत

जाडोको याममा , बेलुकीको समयमा सिरकमा गुटमुटिएर स्वस्थानीको कथा सुन्न मजा बेग्लै हुने गर्थ्यो । हुन त कहिले काहीँ आमाको छुइ भएको बेलामा पूजा गर्नुपर्ने अभिभारा बोक्नुपरे पनि मलाई स्वस्थानीको याम रमाइलो लाग्ने गर्दथ्यो । वर्षको १ पटक सालिनदी पनि पुगिएकै हुन्थ्यो । थाह छैन कैयौँ वर्ष देखि सुन्दै आएको एउटै कथालाई दोहोर्‌याई दोहोर्‌याई सुन्दा पनि त्यती बिध्न रमाइलो किन लागेको हो । विशेष त पाचौँ अध्यायको त्रिपुर दहन मलाई सह्रै मन पर्ने गर्दथ्यो । कुमारले ताराकाक्षको शिरकाटेको  , गोमाको दुःख र पछि ऐश्वर्य प्राप्ति साथै स्कन्द पुराणका अनेकन कथा बोकेर बनेको स्वस्थानी साच्चै नै मलाई अहिले पनि रोचक लाग्छ ।साच्चैँ मेरो वाल्यकालमा मैले स्व को सिद्धान्त (स्व‌ धर्म , स्व स्थान ) नबुझेको भए पनि मेरो मानसपटलमा तिनै तस्विरहरु डुलिरहेको हुन्थ्यो र डुलिरहन्छ अहिले पनि ।

मेरा स्वस्थानीका कथा कुनै किम्वदन्ती नै किन नहुन् मालाई त्यसमा मेरो बाल्यकालको याद आउँछ , कथासँगै आमाका अर्तिहरुको याद आउँछ ।  मेरो संस्कारमा मलाई गौरव लाग्छ ।तर मसँग अहिले ती दिनका याद मात्र बाँकी छन् । के ती दिनहरु फेरि  फर्किएर आउलान् ?   

~~हिमवत~~